«Ժողովրդի կողմից ընտրված» ՀՀ վարչապետ Նիկոլ Փաշինյանին

«Ժողովրդի կողմից ընտրված» ՀՀ վարչապետ Նիկոլ Փաշինյանին։

Սա առաջին, եւ ես հուսով եմ, որ վերջին Ամանորը կլինի, որ դու հեռուստատեսությամբ կշնորհավորես հայ ժողովրդին: Նախորդ իշխանությունները վերջին շրջանում հեռացան ժողովրդից, գտնվում էին պատրանքների մեջ: Դու եկար իշխանության՝ նախորդ իշխանությունների հասարակության կողմից մերժման ալիքի վրա, եւ Դու հմտորեն օգտվեցիր այս հանգամանքից: Դու եւ Քո կուկլավոդները, հմտորեն մանիպուլացնելով ընդհանուր դժգոհությունները, ճնշելով խորհրդարանի պատգամավորներին, փողոցներ փակելով, ամբողջ երկիրը կաթվածահար անելով, ստիպեցիք պատգամավորներին քվեարկել Քո օգտին: Սակայն անգամ սա Քո մոտ ստացվեց միայն երկրորդ փորձից: Այնուամենայնիվ, երբ իշխանության եկար, մի շարք խոստումներ տվեցիր մարդկանց: Այն, որ տնտեսությունը կզարգանա թռիչքաձև արագությամբ, բազմաթիվ հայրենակիցների Ռուսաստանից եւ Արեւմուտքից միլիարդավոր ներդրումները կլցվեն երկրի բյուջեի մեջ, որեւէ քաղաքական ռեպրեսիաներ չեն լինի, այլեւս «հեռախոսային/զանգովի» արդարադատություն չի լինի, դատավորները անկախ կլինեն, կոռուպցիան կվերանա, թոշակներն ու աշխատավարձերը կբարձրանան, գործազրկությունը կվերանա, երկրից արտագաղթը կդադարի և հայրենադարձությունը կսկսվի: Թվարկվածները պարզապես դատարկ խոսքեր էին ...

Իսկ ի՞նչ կատարվեց իրականում: Կոռուպցիայի դեմ պայքարը վերածվեց բուտաֆորիայի: Եվ ավելին՝ այն ընդունեց ավելի վայրի եւ ձևափոխված տեսք: Գործազրկության կրճատման փոխարեն դու ավելացրիր նոր գործազուրկներ, դուրս շպրտեցիր լուծարված նախարարությունների աշխատակիցներին փողոց: Նախօրերին Երեւանի բոլոր համայնքների շատ աշխատակիցներ հեռացվեցին, բուհերի եւ դպրոցների դասախոսական կազմը կրճատվում է: Գործազուրկների թիվը հասել է մոտ 55 հազարի: Երկրում ներդրում չի կատարվում, քանի որ Սփյուռքը, որը վախեցած է քո կողմից իրականացվելիք գործելաոճից ՝ Սփյուռքի նախարարության լուծարումից, վախենում է ինչ-որ բան ներդնել Հայաստանում: Իհարկե, ոչ մի հայրենադարձություն չկա, մարդիկ ինչպես լքում էին երկիրը, այնպես էլ հիմա են հեռանում: Դառնալով վարչապետ՝ դու, նախեւառաջ, քո նախորդ խոստումների հակառակ, ստիպեցիր կառավարությանը մշակել եւ ընդունել կողոպտիչ որոշում `կուտակային կենսաթոշակային համակարգի ներդրման վերաբերյալ: Հայ առաքելական եկեղեցու վրա իրականացվել են մի շարք հարձակումներ, ընտանեկան արժեքների ավանդական համակարգը ոչնչացվում է, բանակն էլ թուլացվում է։ Դատավորները վերջնականապես կորցրեցին իրենց անկախությունը, դու բառացիորեն ահաբեկում ես իրենց հանրայնորեն սպառնալիքներով եւ հեռախոսազանգերով: Եվ ավելին, Դու վարում ես կուլիսային, լիֆտային բանակցություններ մեր դարավոր երդվում թշնամի-հարեւանի հետ՝ վտանգի տակ դնելով Արցախի անկախությունը և անվտանգությունը: Հիմնական օրենքը, որով դու առաջնորդվում ես՝ ՈՐՈՎՀԵՏև ԵՍ ԵՄ ԱՅԴՊԵՍ ՈՒԶՈՒՄ: Ու ելնելով այն փաստից, որ քո բոլոր գործողությունները ուղղված են Հայաստանի երկրորդ նախագահ Ռոբերտ Քոչարյանին հետապնդելուն, որը տեղի է ունենում օրենքը ցուցադրական անտեսելով, կարող եմ պատկերացնել, թե ինչպես ես ցնցվում վախից՝ լսելով Ռոբերտ Քոչարյանի անունը:

Գիտես, թե ինչո՞ւ ես այսքան վախենում նրանից: Քանի որ Նա իսկապես գիտի՝ դու ինչ ես իրականում, ով է իսկապես պատասխանատու 2008 թ. մարտի 1-ի ողբերգական իրադարձությունների համար, ով սկսեց առաջինը կրակել, ով ամբոխը հասցրեց ագրեսիվ խելագարությանը, և ով հանուն սեփական դիվիդենտների մարդկանց գիտակցաբար տարավ մահվան։ Եվ Դու գիտես, որ Նա գիտի դա: Եվ ոչ միայն Նա ...

Ի դեպ , ես չեմ ուզում քեզ նմանվել և քո պես չեմ ներքաշի քո ընտանիքը խոսակցության մեջ: Երեխաները ոչնչում մեղավոր չեն ...

Իմացիր ! Գոնե մի քիչ սթափ դատողություն ունեցող մարդիկ չեն ընդունում այն ամենը, ինչ դու անում ես մեր երկրի հետ: Հասկանում են, որ քո ճանապարհն ազգի ինքնաոչնչացման ճանապարհն է: Եվ մենք քիչ չենք:

Եվ որպես վերջաբան, ես միայն ուզում եմ շնորհավորել քո երեխաներին Ամանորի եւ Սուրբ Ծննդյան տոների կապակցությամբ եւ մաղթում եմ, որ շատ տարիներ անց նրանք ստիպված չլինեն կարմրել, վատ զգալ իրենց ծնողների համար:

Արմեն Մանուկյանի ֆեյսբուքյան էջից

Источник: http://www.7or.am/am/news/view/153348/

Սերժացման «քարտ բլանշ» Նիկոլ Փաշինյանին

Կառավարությանն առընթեր Քաղաքացիական ավիացիայի գլխավոր կոմիտեի պետ Տաթևիկ Ռևազյանի համար պետական բյուջեի միջոցներով թանկարժեք մեքենա է գնվել:

Լուրին հաջորդում են հայհոյանքներն՝ ուղղված երիտասարդ աղջկան «Toyota Camary» «չկամեցողների» հասցեին:

Վարչապետի տիկինը, չլինելով պետական գործիչ և չիրականացնելով պետական գործառույթ, հայտարարում է՝ աշխատանքային այցով կլինի Շվեյցարիայում: Շատ տրամաբանական և արդարացի հարցադրմանը, թե ինչ միջոցներով են կազմակերպվում Աննա Հակոբյանի արտասահմանյան ուղևորությունները, վերջինս ներկայացնում է մանրամասն հաշվետվություն՝ ինչքան է ծախսվել և ինչ միջոցներով:

Այս նյութերը ևս հասարակության մի մասի կողմից արժանանում են պարսավանքի, բայց բոլորովին այլ կոնտեքստում. «Լավ է արել, չուզողի աչքն էլ հանել է, ո՞ւմ ինչ գործն է», «Աննա Հակոբյան, ո՞ւմ ես հաշվետվություն տալիս, վարվիր այնպես, ինչպես ճիշտ ես համարում», «բա Սերժի փողերը ինչո՞ւ չէիք հաշվում, լա՞վ էր, որ թալանում էին» և այլն…

Հասարակության մի ստվար հատված այսպիսով անսահմանափակ ազատություն է տալիս գործող իշխանություններին: Սա ոչ այլ ինչ է, քան «սերժացման» քարտ բլանշ, որը քաղաքացիներն ինքնակամ տալիս են Փաշինյանին և նրա թիմին՝ այդպիսով արժեզրկելով հեղափոխության ողջ գաղափարը:

Ինչո՞ւ են ամենաթողությամբ «պարգևատրում» Փաշինյանի թիմին

Ապրիլին Հայաստանում տեղի ունեցած գործընթացը կուլմինացիան էր՝ համակարգի դեմ ավելի քան տասը տարիների անողոք պայքարի, որն ուղեկցվեց բազմաթիվ կորուստներով և զրկանքներով: Տարիների պայքարը ոչ թե անձերի, այլ հենց կարծրացած այն համակարգի դեմ էր, որը խրախուսում էր կոռուպցիան, անպատժելիությունը, ամենաթողությունը…

Հեղափոխությունը հենց այդ բարքերը մերժելու խորհուրդն էր իր մեջ կրում: Եվ եթե անձերի փոփոխությունից հետո հասարակությունը հաջորդ իսկ քայլով վերջ չի դնելու ամենաթողությանը, արմատախիլ չի անելու հին բարքերի ծիլերը՝ նորերի շարքերում, ավելին, եթե իր պահվածքով պարարտացնելու է այդ հողը՝ Փաշինյանի թիմին հեղափոխական ալիքը գլխավորելու համար «պարգևատրելով» ամենաթողությամբ, ապա սրա հետևանքները կարող են լինել կործանարար:

Մերժված հինը նորի հետ համեմատելն ու այդպիսով նորի «առավելություններն» ընդգծելն անթույլատրելի սխալ է, որը շարունակաբար կիրառվում է: Կադրային յուրաքանչյուր անհաջող նշանակման, այս կամ այն սխալ որոշման վերաբերյալ օբյեկտիվ քննադատության հակափաստարկ բերվում է ոչ թե հիմնավոր բացատրություն, այլ սլաքներն ուղղվում են նախորդի ուղղությամբ՝ լա՞վ էր, որ այսօրվա անհաջող կադրին փոխարինում էր այս կամ այն օդիոզ ֆիգուրը, լա՞վ էին Սերժ Սարգսյանի ռեժիմի անհեթեթ որոշումները և այլն… Խաղի այս անթույլատրելի կանոնները թելադրեց հասարակության մի խումբ, և այն շատ արագ յուրացրին երիտասարդ «հեղափոխականները»՝ հասկանալի պատճառներով: Նախորդների համեմատ «լավը երևալը» իրենցից ջանք, գիտելիքներ ու տեսլական այլևս չի պահանջի…

Արտահերթ խորհրդարանական ընտրություններից հետո «Քաղաքացիական պայմանագիր» կուսակցության անդամ Լենա Նազարյանը հարցադրմանը, թե օգտագործվե՞լ են վարչական լծակներ, հայտարարում է. «Մի զանգով կարող էինք օգտագործել վարչական ռեսուրս, բայց հրաժարվեցինք»:

Այսինքն, ՔՊ անդամներն այն վստահությունն ունեն, որ հեղափոխությունից հետո իրենք էլ կարող էին զանգերով հարց լուծել, բայց բարի կամք են դրսևորել և չեն արել, և մենք՝ ՀՀ քաղաքացիներս, պետք է միայն երախտապարտ լինենք դրա համար:

Խորությամբ չպատկերացնելով տեղի ունեցածը՝ նրանք դեմ չեն նաև դափնիներին: Ինքնակամ ամենաթողությունից, շռայլություններ թույլ տալու գայթակղությունից հրաժարվելու, սեփական ազատություններին հագուրդ չտալու համար դեռևս կայանալու և ինքնաբավ դառնալու խնդիր ունեն նորեկները: Սեփական ձեռքերով կաղապարներ պատրաստելը զարգացման տեսլական, աշխարհայացք ունեցող ուժեղ անձնավորությանը բնորոշ առանձնահատկություն է: Այս պարագայում, երբ ուժեղ ֆիգուրների վակուումում է ձևավորվել Հայաստանի առաջիկա մի քանի տարիների իշխանությունը, հասարակությունն առնվազն «դափնիներ» բաժանելու ժլատությամբ և պահանջատիրությամբ պիտի կերտի մեր երկրի ապագան:

Արմենուհի Վարդանյան

Источник: http://galatv.am/hy/anatylitcs/266127/