Ոչ մի երկիր պայմանական Լևոնով ու պայմանական Նիկոլով ոչնչի չի հասել

Ազգերի մենթալիտետը ձևավորվում է առասպելների ու հեքիաթների շնորհիվ, որոնցով դաստիարակում են փոքր հասակից։ Դրանցով մտածելակերպի սխեմաներն են գծվում։

Հայերի մտքի սխեմայի վրա Սասնա Ծռեր էպոսն է մեծ դեր կատարել։ Գալիս է Դավիթը, Սանասարը կամ այլ փրկիչ ու հերոս և լուծում է մեր խնդիրները։

Ամեն նոր փրկչին ամբոխը դիմավորում է վանկարկումներով․ ասենք օրինակ "Լևոն, Լևոն", "Մանվել, Մանվել", հետո հիասթափվում են, մտնում են քարանձավ ու սպասում նոր փրկչին, հետո բացականչում են "Նիկոլ, Նիկոլ", հետո նորից է սկսվում հիասթափության և քարանձավ մտնելու պրոցեսը։

Ոչ մի երկիր պայմանական Լևոնով ու պայմանական Նիկոլով ոչնչի չի հասել։ Երկրները կառավարվում են սկզբունքներով, որի շուրջը համազգային պահմանավորվածություն է ձեռք բերվում ու դրանց հիման վրա ձևավորվում են կանոններ ու օրենքներ, որոնց կատարումը ապահովում են համապատասխան ինստիտուտներն ու ինստիտուցիաները։

Հասկանալի է, հաճելի է լինել փրկիչ ու հերոս, հաճելի է նաև նրանց ստվերի տակ մտնելն ու սրբության շողերից օգտվելը, հասկանալի են հերոսին չխանգարելու կոչերը։

Հերոսը գիտի, թե ինչ է անում, իսկ ցանկացած մտքի շարժ նրան շեղում է կենտրոնանալ ու հրաշքներ գործել։ Հերոսին երկրպագուներ են պետք ու կատարողներ, առանց հարցնելու գերագույն ստրատեգիայի մասին, բայց վերջ ի վերջո դա քարանձավով է ավարտվելու։

Հայերի համար հերոս ունենալն հակացուցված է, երբ հերոս եք տեսնում, հեռու փախեք։

Ստեփան Դանիելյանի ֆեյսբուքյան էջից

Источник: http://zham.am/?p=25138&l=am

Ռուսաստանաբնակ հայ գործարարները մերժո՞ւմ են Փաշինյանին

Հայաստանի վարչապետ Նիկոլ Փաշինյանն, ով աշխատանքային այցով Մոսկվայում էր գտնվում, հանդիպում է ունեցել նաև ՌԴ մայրաքաղաքի գործարար շրջանակների հայ ներկայացուցիչների հետ, որոնց կոչ է արել ներդրումներ անել Հայաստանի տնտեսության մեջ: Մոսկվայի Ararat Park Hyatt հյուրանոցում կայացած հանդիպումը ներկայացուցչական չես անվանի՝ ներկա հայազգի խոշոր գործարարներից կարելի է առանձնացնել, թերևս, միայն Ռուբեն Վարդանյանին և Կամո Ավագումյանին, ով առավել հայտնի է որպես «Ավիլոնի Կամո»: 

  

Ռուբեն Վարդանյանի ներկայությունը կարելի է սիմվոլիկ համարել միայն այն առումով, որ վերջինս վարչապետի ելույթի ողջ ընթացքում ննջում էր, իսկ այնուհետև մի շարք հարցադրումներ կատարեց, որոնց հիմնական մեսիջը Փաշինյանի կառավարության՝ ներդրումների համար անհրաժեշտ կայունությունը ապահովելու ունակության բացակայությունն է, որի արդյունքում բիզնեսը չի շտապում գալ Նոր Հայաստան: Ինչ վերաբերում է Կամո Ավագումյանին, որոշ տեղեկությունների համաձայն՝ նա Փաշինյանի հետ հանդիպման էր եկել ոչ թե Հայաստանի ներդրումային առավելություններին ծանոթանալու, այլ խնամու՝ «Դոն Պիպոյի» (Արթուր Ասատրյան) համար բարեխոսելու նպատակով: Հիշեցնենք՝ այս պահին Արթուր Ասատրյանը կալանավորված է: Ընդ որում. ժամանակին նույն Ավագումյանը խնամու համար բարեխոսել էր նաև նախկին վարչապետ Սերժ Սարգսյանի մոտ: Թե ինչ արդյունք է տվել Ավագումյանի բարեխոսությունը այս անգամ, և տվե՞լ է արդյոք ընդհանրապես՝ ցույց կտա ժամանակը:

 

Միևնույն ժամանակ, ուշագրավ էր ռուսաստանյան բիզնեսի գլխավոր ներկայացուցիչներից մեկի՝ «Տաշիր Գրուպ»-ի սեփականատեր Սամվել Կարապետյանի բացակայությունը վարչապետ Նիկոլ Փաշինյանի հետ հանդիպմանը: Կարելի է ենթադրել, որ Կարապետյանի և նրա «թևի» բոյկոտը պատահական չէ, թավշյա հեղափոխությունից հետո ռուսաստանահայ գործարար Սամվել Կարապետյանն ամեն գնով փորձում էր բուրգի վերեւում պահել Կարեն Կարապետյանին, որի ֆինանսատնտեսական հենարանն էլ հանդիսացել է վերջինիս վարչապետության ողջ ընթացքում: Այսօր, փաստացի, Կարապետյանի «թևը» հարկ չի համարել ներկայանալ վարչապետի հետ հանդիպմանը՝ ինչն, ինքնին, մեսիջ է ՀՀ նոր կառավարությանը և անձամբ Նիկոլ Փաշինյանին...

 

Ընդ որում՝ նման տապալված հանդիպումը ինչ-որ չափով նաև Մոսկվայի մեսիջն էր Հայաստանի նոր կառավարությանը, այն պարզ պատճառով, որ եթե անգամ հայ գործարարները մեծագույն ցանկություն դրսևորեին օժանդակելու հայրեկանական տնտեսության զարգացմանը, դա իրականություն չէր դառնա՝ Մոսկվայի պրեսինգի և «դաբրոյի» բացակայության պայմաններում...

Источник: http://topnews.mediamall.am/?id=193356