Ի՞նչ է Ոստիկանությունը պահանջում NEWS.am–ից. գործակալության հայտարարությունը

Նախընտրական քարոզարշավի շրջանակում NEWS.am–ը հրապարակել է տարբեր քաղաքական ուժերի ներկայացուցիչների ֆեյսբուքյան ուղիղ միացումները  և գրառումները` նպատակ ունենալով ապահովել ընտրություններին մասնակցող բոլոր քաղաքական ուժերի` հավասար պայմաններում լուսաբանվելու հնարավորությունը։  

Այսպես, հրապարակվել են նաև ՀՀԿ փոխնախագահ Էդուարդ Շարմազանովի ուղիղ միացումները, այդ թվում` «Արդեն սկսել են մարդիկ փնտրել, որոնք ցուցմունք կտան մեր թեկնածուների դեմ. Շարմազանովն անուն տվեց»  և «ՀՀԿ-ի աջակիցներին հրավիրում են ոստիկանություն՝ բացատրական զրույցների․ Շարմազանով»  վերտառությամբ տեղեկությունները։

Դեկտեմբերի 7–ի երեկոյան NEWS.am–ի խմբագրություն է այցելել Հայաստանի Հանրապետության Ոստիկանության Քրեական հետախուզության գլխավոր վարչության ներկայացուցիչը և պահանջել տրամադրել վերոնշյալ հրապարակումների բովանդակությունը հաստատող ապացույցներ։

Փաստաբանների միջամտությունից հետո ոստիկանության աշխատակիցը NEWS.am–ին հանձնել է երկու գրություն, որոնցում մեջբերված են վերոնշյալ հրապարակումները և խնդրում են տրամադրել «վերոգրյալը հաստատող կոնկրետ կամ լրացուցիչ այլ փաստեր»։

Ոստիկանության աշխատակիցը հայտնել է նաև, որ սա իր վերջին այցը չէ, և այսուհետ պարբերաբար տարբեր հրապարակումների հետ կապված այցելելու են խմբագրություն` պահանջելով նմանատիպ ապացույցներ։ Ոստիկանության աշխատակցի այցի վերաբերյալ գլխավոր խմբագրի ֆեյսբուքյան էջում համապատասխան գրառումից հետո խմբագրություն է այցելել Ոստիկանության Շենգավիթի բաժնի երկու աշխատակից` փորձելով վստահեցնել, որ իրենք տեղյակ չեն` ով և ինչ նպատակով է այցելել գրասենյակ և պատճառաբանելով, թե հնարավոր է` այցելողը ոստիկանության աշխատակից չի եղել։

Նշենք, որ գրությունների բովանդակությունից ակնհայտ է, որ հարցում կատարողները գիտակցել են, որ խոսքը Էդուարդ Շարմազանովի ֆեյսբուքյան էջում հրապարակված տեսանյութերի սղագրության մասին է և, բնականաբար, խմբագրությունում չէին կարող լինել «վերոգրյալը հաստատող կոնկրետ կամ լրացուցիչ այլ փաստեր», կամ, ինչպես բանավոր են ներկայացվել` ապացույցներ։

Ընտրություններից երկու օր առաջ լրատվական գործակալության խմբագրություն կատարած նման այցը, պարբերաբար վերադառնալու «սպառնալիքները» ոչ այլ ինչ են, եթե ոչ առնվազն փորձ` ազդելու տարածաշրջանի և Հայաստանի թիվ մեկ լրատվական գործակալության վրա` նպատակ ունենալով խոչընդոտել ընտրությունների լիարժեք և համակողմանի լուսաբանումը։

Իրեն ժողովրդավարական և իրավական պետություն հռչակած երկրում նման գործելաոճն անընդունելի է և վտանգում է երկրում խոսքի ազատությունը։

NEWS.am–ը հայտարարում է, որ ինչպես և նախկինում, այսուհետ էլ աշխատելու է իր որդեգրած գործելաոճով, այն է` հասարակությանն ապահովել անաչառ և բազմակողմանի լրատվությամբ, և թույլ չի տա իր իրավունքների որևէ ոտնահարում, ինչպես նաև իր վրա ճնշման ուղղակի և անուղղակի որևէ փորձ։

Источник: https://news.am/arm/news/485124.html

«Տերերը փոխվեցին, ստրուկները մնացին նույնը»․ Դավիթ Շահնազարյան ( տեսանյութ ) :

Հայաստանը ՌԴ քաղաքացիություն ընդունած բնակիչների թվով նախկին միութենական հանրապետությունների մեջ առաջատար է

«Մութ ու ցուրտ» 90-ականներին Հայաստանից արտագաղթի հզոր ալիքը, թվում էր, ավարտվել է հաջորդ տասնամյակում։ Հայրենիքը մշտապես լքելու մտադրություն ունեցողների թիվը ինքնաբերաբար կրճատվել է։ Սակայն արտագաղթելու ցանկություն ունեցողներն, այնուամենայնիվ, քիչ չեն՝ վերջին տարիներին կրկին բնակչության նկատելի արտահոսք է դիտարկվում։ Ճիշտ է՝ ոչ այնքան հզոր, ինչպես նախկինում էր։ Սակայն արտագաղթը առկա է եւ նույնիսկ աճում է։ Դրա պատճառներից մեկը Ռուսաստանում քաղաքացիություն ստանալու իրական հնարավորություններն են։

Չնայած Ռուսաստանի տնտեսության մեջ ճգնաժամային դրսեւորումներին, այնտեղ կյանքի մակարդակն, այնուամենայնիվ, ավելի բարձր է, քան նախկին միութենական շատ հանրապետություններում։ Այս գործոնը խթանում է Ռուսաստան արտագաղթը։ Այսպես, ընթացիկ տարվա հունվար-սեպտեմբեր ամիսներին Ռուսաստանի քաղաքացիություն է ստացել նախկին միութենական հանրապետություններից 185 հազար մարդ, այդ թվում՝ ավելի քան 19,9 հազարը Հայաստանից։ Այս թվաքանակի մեջ մեր երկրի մասնաբաժինը բավական բարձր է՝ 10,8 տոկոս։

Ռուսաստանի քաղաքացիություն ընդունածների թվով մենք զիջում ենք միայն Ուկրաինային(60,3 հազ․ մարդ), Ղազախստանին (31,9 հազ․ մարդ) եւ Տաջիկստանին (24,9 հազ․ մարդ)։ Այսինքն այն երկրներին, որոնց մենք զգալիորեն զիջում ենք բնակչության թվով։ Այստեղից էլ՝ Ռուսաստանի քաղաքացիություն ընդունածների մեջ, ելնելով բնակչության մասնաբաժնից, նախկին ԽՍՀՄ-ի երկրների շարքում Հայաստանն առաջատար է՝ 0,7 տոկոս՝ Ոկրաինայի 0,1, Ղազախստանի 0,2 եւ Տաջիկստանի 0,3 տոկոսի դեմ։

Սրա հետ մեկտեղ, մեր երկիրն առանձնանում է արտագաղթողների ազգային կազմով։ Նախկին միութենական երկրներից շատերում պահպանվել է ռուսական սփյուռքը՝ մի տեղում՝ զուտ խորհրդանշական, մյուս տեղում՝ բավական մեծաթիվ։ Ասենք, նույն Ղազախստանում ընթացիկ տարվա սկզբին ռուսները կազմում էին ավելի քան 3,5 մլն, այսինքն բնակչության մոտ 1/5 մասը։ Վերջին տարիներին նրանց թիվն անշեղորեն կրճատվում էր ինչպես բացարձակ արտահայտությամբ, այնպես էլ հանրապետության բնակչության ընդհանուր թվի մեջ իր մասնաբաժնով։ Հիմնական պատճառներից մեկը ռուսների արտագաղթն է իրենց պատմական հայրենիք։ Այդպիսին է իրավիճակը նաեւ Ուկրաինայում, որը վարկանիշով առաջին տեղում է։

Հայաստանում, 2011թ․ բնակչության մարդահամարի տվյալներով, ապրում էր մոտ 12 հազար ռուս (երկրի ընդհանուր բնակչության 1 տոկոսից էլ պակաս)։ Նույնիսկ այս թվի պարզ համադրումը անցյալ տարի եւ այս տարվա հունվար-սեպտեմբեր ամիսներին Ռուսաստանի քաղաքացիություն ընդունածների հետ (45 հազար մարդ), վկայում է այն մասին, որ արտագաղթողների մեծ մասը Հայաստանի բնիկ ապրողներն են։

Ներքոհիշյալ գրաֆիկում բերված է Ռուսաստանի քաղաքացիություն ընդունած Հայաստանի բնակիչների թվի աճը՝ անցյալ եւ այս տարիների եռամսյակներում՝ հաշվարկած հազար մարդով։ Դիագրամայից հստակ երեւում է տվյալ ցուցանիշի աճի տենդենցը։

Ռուսաստան եւ այլ երկրներ Հայաստանի քաղաքացիների արտագաղթի պատճառները հայտնի են։ Դրանք են՝ մեր երկրում զանգվածային գործազրկությունը, դրամային եկամուտների ցածր մակարդակը (այդ թվում աշխատավարձերն ու թոշակները), ինչպես նաեւ աճող սերնդի ապագայի հետ կապված հարցերը։ Այս տեսակետից, ապրելու համար հրապուրիչ բավական մեծ թվով երկրներ կան։ Սակայն, ի տարբերություն դրանցից շատերի, Հայաստանի բնակիչների համար Ռուսաստանում շատ ավելի հեշտ ու դյուրին է քաղաքացիություն ստանալը։ Այդ պատճառով մեր շատ աշխատանքային միգրանտները (նաեւ այդ կարգավիճակը չունեցող Հայաստանի բնակիչները) դեմ չեն օգտվելու նման հնարավորությունից։

Աշխատանքային միգրացիա կա նաեւ Մերձբալթյան համեմատաբար բարեկեցիկ հանրապետություններում։ Սակայն, հասկանալի պատճառներով, նրանց վեկտորն ուղղված է Եվրոպայի տնտեսապես ավելի զարգացած երկրներին։ Այս հանրապետություններից Ռուսաստանի քաղաքացիություն ընդունում են հաշված թվով մարդիկ, թեեւ այնտեղ էլ ոչ փոքրաթիվ ռուսական սփյուռք կա։ Օրինակ, ընթացիկ տարվա հունվար-սեպտեմբեր ամիսներին Ռուսաստանի քաղաքացիություն ընդունել է Էստոնիայի ընդամենը․․․ 28 բնակիչ։

Սմբատ Գրիգորյան

Источник: https://news.am/arm/news/484840.html